Autoritetet greke dyshojnë se trupi i pajetë i gjetur i djegur brenda një makine në zonën e Voitias në Halkidha i përket një 27 vjeçari shqiptar, të shpallur të zhdukur prej datës 4 nëntor të këtij viti. Dyshimet janë se viktimë është shtetasi shqiptar, Sulo Halili, me origjinë nga Tepelena, ndërsa për të konfirmuar zyrtarisht këtë pistë është kërkuar kryerja e analizave të ADN. 27-vjeçari njihej si njeri punëtor dhe pa probleme me drejtësinë në Greqi, por nga dëshmitë e para që kanë marrë autoritetet që po hetojnë këtë rast, dyshohet se ai mund të jetë përfshirë kohët e fundit në aktivitete të paligjshme, çka mund t’i kenë kushtuar edhe jetën. Nga këto dëshmi, mësohet se Halili shoqërohej prej pak kohësh me disa persona të rinj, që të afërm dhe familjarë të tij nuk i njihnin. Ditën e ngjarjes dyshohet se ai mund të këtë lënë një takim me këta persona, takim që i ka kushtuar jetën. Trupi i karbonizuar brenda makinës u gjet i prangosur dhe me një plumb në të.