Kryeministrat Edi Rama dhe Kiriakos Mitsotakis e kanë shfrytëzuar ceremoninë e varrimit të Kryepeshkopit Anastas për të shkëmbyer drejtpërdrejt me njëri-tjetrin një bisedë të shkurtër. Sipas mediave greke, Rama dhe Mitsotakis kanë pasur një takim kokë më kokë që ka zgjatur pak minuta, por ka qenë me përmbajtje domethënëse sa u takon marrëdhënieve mes dy vendeve. Kathimerini shkruan se detajet nga biseda mes tyre mund të kuptohen nga deklaratat publike që ata patën për mediat greke, ku si Mitsotakis, ashtu edhe Rama mohuan problemet mes dy vendeve. Gazeta citon Mitsotakis teksa deklaron se “nuk ka problem që të mos zgjidhet me anë të dialogut dhe fakti që jemi shtete fqinj, është një arsye më tepër që çdo problem duhet ta zgjidhim me dialog. “Ne kemi marrëdhënie të mira dhe duhet të kemi marrëdhënie të mira, ka deklaruar Mitsotakis pasi është përshëndetur me Edi Ramën.