Aeroporti ndërkombëtar i Tajvanit, Taojuan, u bë skenë e një pushtimi të rremë kinez të mërkurën, për të parën herë, ndërsa ushtria e ishullit kreu një stërvitje që kishte si qëllim ndaljen dhe zbrapsjen e një sulmi të mundshëm nga Pekini. Stërvitja kishte si qëllim testimin e koordinimit dhe kapaciteteve të reagimit të degëve të ndryshme të ushtrisë së tajvanit, në rast të një pushtimi kinez. Me helikopterët ushtarakë në qiell dhe ushtarët në pistë, stërvitja në aeroportin më të frekuentuar të Tajvanit, reflekton seriozitetin e Taipeit në nevojën e përgatitjes për cdo skenar të mundshëm përballë frikës në rritje për një agresion ushtarak të Kinës që është shumëfishuar që nga pushtimi rus i ukrainës, vitin e kaluar. Partia komuniste kineze pretendon se Tajvani që vetëqeveriset, është territor i saj, pavarësisht se asnjëherë nuk e ka kontrolluar atë dhe ka kaluar dekada në përgatitje për ta izoluar atë diplomatikisht. Pekini nuk ka përjashtuar as mundësinë e përdorimit të forcës për të marrë kontrollin e Tajvanit, një ditë, dhe ka shtuar presionin ushtarak mbi Taipein duke dërguar avionë luftarakë në qiejt pranë ishullit dhe luftanije në ujërat përreth tij.