Ministria tajvaneze e mbrojtjes publikoi të martën manualin e saj të përditësuar të mbrojtjes civile, duke thënë se qëllimi nuk është të shkaktojë panik, por t'i përgatisë njerëzit për një krizë të mundshme si psh një sulm nga Kina, e cila e konsideron ishullin si territorin e vet. Tajvani i qeverisur në mënyrë demokratike ka rritur rezistencën dhe përgatitjet e mbrojtjes, ndërsa Kina ka shtuar aktivitetet e saj ushtarake rreth ishullit gjatë pesë viteve të fundit dhe ka nxjerrë mësime nga mbrojtja e Ukrainës kundër Rusisë. Manuali i ri i Tajvanit, jep një listë skenarësh me të cilët mund të përballen banorët e ishullit, nga fatkeqësitë natyrore si një cunami e deri te një pushtim i plotë, dhe është botimi i tretë pas të parit, në vitin 2022. Agjencia e Mobilizimit të Mbrojtjes Gjithëpërfshirëse të ushtrisë së Tajvanit, tha në një konferencë për shtyp në ministrinë e mbrojtjes se 5,000 kopje të printuara do të shpërndahen fillimisht, ndërsa manuali mund të shkarkohet edhe në internet. Ekziston edhe një version në gjuhën angleze. "Pse po e publikojmë këtë manual gjatë një kohe paqeje? Nuk është për të krijuar panik, por për t'u thënë njerëzve se duhet të bëjnë përgatitje ndërsa ka paqe, në mënyrë që kur të ndodhë kriza të dini çfarë të bëni", thanë zyrtarët. "Sa më herët të jeni të përgatitur, sa më herët ta studioni broshurën, aq më herët do të jeni të sigurt", shtuan ata.