Top News – Tajvani aktivizon sistemin e mbrojtjes / Ushtria kineze ka lëshuar disa raketa balistike

Kina ka nisur nga ora 12, sipas orës lokale, stërvitjet më të mëdha ushtarake të kryera ndonjëherë përreth Tajvanit në një valë tensionesh në rritje si reagim ndaj vizitës në ishull të Nensi Pelosit. Mediat zyrtare nënvizojnë se bëhet fjalë për manovra ushtarake në shkallë të gjerë që përfshijnë edhe lëshimin real të raketave dhe artilerisë në shtatë zona detare pranë Tajvanit, në një provë force të ushtrisë popullore të Kinës. Si reagim, Tajvani ka aktivizuar sistemet e tij të mbrojtjes. Forcat e armatosura të Tajvanit po përgatiten për luftë, pavarësisht se nuk e duan atë – tha ministria e mbrojtjes e ishullit. 10 minuta para fillimit të stërvitjeve kineze, departamenti i mbrojtjes në Tajvan lëshoi një deklaratë në të cilën akuzon qeverinë e pekinit për sjellje irracionale me manovrat e saj ushtarake me zjarr të vërtetë. Të mërkurën, zyra detare dhe portuale e Tajvanit ka lëshuar paralajmërime për anijet që të evitojnë tranzitin në zonat e prekura nga stërvitjet. Qeveria e Taipeit tha se aktivitetet kineze kanë prekur 18 trajektore ndërkombëtare. Stërvitjet ushtarake kineze kanë ndezur alarmin edhe në Japoni. Sipas Tokios, ato mund të përshpejtojnë diskutimet që kanë nisur mbi rolin e vendit në rast pushtimi të tajvanit duke detyruar politikanët japonezë të mendojnë në mënyrë më konkrete një mundësi të tillë.