Ministri i Jashtëm i Italisë, Antonio Tajani kritikoi qasjen e Bashkimit Europian ndaj kompanive prodhuese në union, që sipas tij, nuk i lejojnë ato që të konkurrojnë në nivel global dhe bëri apel për një trajtim ndryshe. Tajani theksoi se ka ardhur koha që Bashkimi Europian të mos jetë vetëm një fuqi tregtare, por edhe një fuqi ekonomike, duke prodhuar dhe konkurruar me prodhimet e saj në mbarë botën. “Europa duhet të ketë fuqi ekonomike dhe jo vetëm tregtare. Ajo nuk duhet të jetë vetëm një treg i madh, por duhet të ketë aftësinë për të konkurruar në një nivel industrial. Kompanitë evropiane duhet të lejohen, nëpërmjet rregullave të konkurrencës, të konkurrojnë në nivel global, sepse në të kundërtën rregullat e BE-së rrezikojnë të mbytin kompanitë evropiane në nivel global”, deklaroi Tajani. Ministri i Jashtëm Italian u ndal edhe te emigrantët e shumtëqë vijnë nëpërmjet Mesdheut nga vende të ndryshme afrikane dhe jo vetëm. Ai theksoi se ka ardhur koha që Mesdheu të mos jetë më një varrezë për emigrantët, por një det paqeje dhe zhvillimi. Pamjet: AFP