Gjyqi për ish-ministrin e brendshem Saimir Tahiri dhe ish-drejtorin e Policisë së Vlorës Jaeld Çela, Gjykata e Lartë ndryshon gjyqtarin relator. Shorti kishte caktuar që në vitin 2022 gjyqtarin Sokol Binaj, por mësohet se në dhjetor të vitit të kaluar, ai ka dhënë dorëheqjen, dhe është caktuar si relator gjyqtari i sapo emëruar Genti Shala. Binaj ka dhënë dorëheqjen me argumentin se ka shqyrtuar kërkesa të mëhershme gjyqësore të Tahirit në ish-Apelin e Krimeve të Rënda. SPAK ushtroi rekurs në Gjykatën e Lartë pasi nuk u pajtua me dënimin e ish-ministrit vetëm për shpërdorim detyre, por kërkon të dënohet edhe për trafik narkotikësh dhe grup të strukturuar kriminal, duke kërkuar 12 vite burg. Ndërkohë ish-gjykata e Shkallës së Parë për Krime të Rënda e dënoi për shpërdorim detyre me 5 vite burg, që zbriste në 3.4 vite me gjykim të shkurtuar, por në fund vendosi pezullimin e dënimit dhe vënien në provë.