Presidenti Donald Trump tregoi të shtunën se ai kishte folur me mbretin e Jordanisë për ndërtimin e mundshëm të banesave dhe zhvendosjen e më shumë se 1 milion palestinezëve nga Gaza në vendet fqinje, një propozim i jashtëzakonshëm ky nga një president në detyrë i SHBA. Trump tha se i kërkoi mbretit Abdullah i II-të i Jordanisë, një partner kyç i SHBA-së në rajon, të pranonte më shumë palestinezë në vendin e tij. "Unë i thashë atij se dua që ata të pranojnë më shumë njerëz, sepse po shikoj të gjithë Rripin e Gazës tani dhe është një rrëmujë e madhe", u tha ai gazetarëve në bordin e Air Force One. Agjencia shtetërore e lajmeve e Jordanisë Petra raportoi për telefonatën me Trump, por nuk përmendi zhvendosjen e palestinezëve. Sipas OKB-së, mbretëria tashmë mban më shumë se 2.39 milionë refugjatë palestinezë. Trump tha se do të dëshironte që edhe Jordania edhe Egjipti, që kufizohet me enklavën e shkatërruar, të strehojnë palestinezë dhe se do të fliste me presidentin egjiptian Abdel Fattah el-Sisi për këtë çështje të dielën. “Po flitet për një milion e gjysmë njerëz dhe kështu ne thjesht do ta pastronim të gjithë këtë gjë”, tha Trump, duke shtuar se ka pasur konflikte shekullore në rajon. “Gaza është një vend i rrënuar tani. Pothuajse gjithçka është shkatërruar dhe njerëzit po vdesin atje, kështu që unë preferoj të përfshihem me disa nga kombet arabe dhe të ndërtoj banesa në një vend tjetër ku mendoj se ata mund të jetojnë në paqe për një ndryshim”, tha Trump duke nënvizuar se strehimi mund të jetë i përkohshëm ose afatgjatë. Përveç vrasjes së dhjetëra mijëra njerëzve, lufta 15-mujore midis Izraelit dhe Hamasit e ka shndërruar pjesën më të madhe të Gazës në gërmadha. Sulmet ajrore izraelite kanë dëmtuar ose shkatërruar rreth 60 për qind të ndërtesave, duke përfshirë shkollat ​​dhe spitalet, dhe rreth 92 për qind të shtëpive, sipas OKB-së. Përafërsisht 90% e banorëve të Gazës janë zhvendosur dhe shumë banorë janë detyruar të zhvendosen vazhdimisht. Komentet e Trump duket se përmbysin dekada të politikës së jashtme të SHBA-së, e cila ka theksuar prej kohësh se kërkon një zgjidhje me dy shtete për Izraelin dhe Palestinën. Ka kohë që ekziston një frikë në rajon se Izraeli dëshiron t'i shtyjë palestinezët nga Gaza për në vendet fqinje, dicka që izraeli e ka hedhur poshtë, por ideja mbështetet hapur nga fraksionet e ekstremit të djathtë të koalicionit qeverisës.