Kryeministri britanik Keir Starmer i tha Presidentit kinez Xi Jinping të enjten se donte të ndërtonte një "marrëdhënie të sofistikuar" me Pekinin për të nxitur ekonominë e Mbretërisë së Bashkuar, duke sinjalizuar një riafrim pas viteve të tëra marrëdhënie të tendosura. Në ditën më të rëndësishme të vizitës së tij katër-ditore në Kinë, e para nga një kryeministër britanik në tetë vjet, Starmer mbajti një samit 80-minutësh me Xi Jinping në Sallën e Madhe të Popullit përpara se të drekonin së bashku. Starmer tha se të dy ata biseduan për futbollin dhe Shekspirin, si dhe për çështje biznesi. Udhëheqësi britanik do të takohet gjithashtu me Kryeministrin Li Qiang. Starmer e ka bërë përmirësimin e marrëdhënieve me ekonominë e dytë më të madhe në botë një përparësi, pavarësisht dyshimeve të vazhdueshme në lidhje me spiunazhin dhe të drejtat e njeriut. "Kina është një lojtare e rëndësishme në skenën globale dhe është jetike që ne të ndërtojmë një marrëdhënie më të sofistikuar ku të mund të identifikojmë mundësi për të bashkëpunuar, por sigurisht, të lejojmë edhe një dialog kuptimplotë mbi fushat ku nuk pajtohemi", i tha Starmer Xi Jinpingut në fillim të takimit të tyre. Presidenti kinez tha ndërkohë se lidhjet me Britaninë kishin kaluar nëpër vështirësi që nuk i shërbenin interesave të asnjërit vend dhe se Kina ishte gati të zhvillonte një partneritet afatgjatë. "Ne mund të arrijmë një rezultat që mund t'i rezistojë provës së historisë", i tha udhëheqësi kinez Starmer-it.