Një studiues i inteligjencës artificiale, i cili është larguar nga kompania Anthropic, ka paralajmëruar se ritmi aktual i zhvillimit të AI mund të përbëjë një kërcënim serioz për njerëzimin. Jacob Coxon, 27 vjeç, i cili më parë ka punuar edhe në OpenAI, tha për BBC se njerëzit që punojnë në kompanitë e inteligjencës artificiale janë “vërtet të frikësuar” nga shpejtësia me të cilën po përparon teknologjia dhe nga pasojat që mund të sjellë. “Besoj se nëse nuk e ngadalësojmë ritmin aktual të përparimit, ekziston një mundësi e madhe që të gjithë të vdesim në të ardhmen e afërt”, deklaroi Coxon. Komentet e tij erdhën pas një postimi të tij mbi rreziqet e AI, i cili u përhap gjerësisht në internet, në një kohë kur shqetësimet për sigurinë e kësaj teknologjie po rriten. Edhe drejtuesi i Anthropic, Dario Amodei, ka bërë thirrje së fundmi për një ngadalësim të zhvillimit të inteligjencës artificiale. Sipas tij, zhvillimi i teknologjisë nuk duhet të ndalet, por rreziqet që ajo paraqet janë “serioze” dhe kompanive dhe qeverive u duhet kohë për t'i adresuar ato. Coxon e mbështeti idenë e një ngadalësimi, por theksoi se ai duhet të jetë i koordinuar ndërkombëtarisht, veçanërisht me Kinën, për të shmangur një “garë në shkallë ndërkombëtare”. “Punonjësit e këtyre kompanive janë plotësisht seriozë kur kërkojnë rregullim, sepse e gjejnë veten të bllokuar në një garë. Dhe kanë frikë nga rezultatet e kësaj gare”, tha ai.