Zhytësit po vazhdojnë kërkimet të hënën në ishullin italian të Siçilisë për gjashtë persona të zhdukur pasi një superjaht u fundos gjatë një stuhie të papritur, duke vrarë të paktën një person, thanë zyrtarët. Jahti luksoz 56 metra i gjatë ishte ankoruar në Porticello, në lindje të Palermos, kur erërat e dhunshme dhe shiu i rrëmbyeshëm përfshinë papritur bregdetin, para agimit, duke shkatërrar baret e plazhit dhe portet e vogla të peshkimit. "Ishte e tmerrshme. Jahti u godit nga një erë vërtet e fortë dhe menjëherë më pas u fundos", i tha agjencisë së lajmeve ANSA një nga të mbijetuarit, Sharlota nga Britania. Bayesian, jahti me flamur britanik, kishte 22 persona në bord, duke përfshirë 10 anëtarë të ekuipazhit, tha roja bregdetare italiane. Shumica e personave në bord ishin britanikë, sipas mediave italiane. E mbijetuara që foli për ANSË-n, tha se vajza e saj e vogël, për pak ishte mbytur. "Për dy sekonda e humba në det, pastaj e kapa përsëri. E mbajta fort pranë vetes, ndërsa deti tërbohej. Shumë njerëz po bërtisnin", ka thënë ajo.