Superhëna e tetorit është më e madhja që keni mundur të shihni deri më tani, për shkak të afërsisë me tokën, ndërkohë që ajo do të kombinohet edhe me një kometë, për të ofruar një spektakël të rrallë në qiell. E treta nga katër superhënat e këtij viti, do të jetë 357,364 kilometra larg tokës të mërkurën në mbrëmje, duke e bërë atë të duket edhe më e madhe dhe më e ndritshme se në gusht dhe shtator. Ajo do të arrijë fazën e saj të plotë hënore të enjten. Ndërkohë, edhe një kometë e rrallë është shfaqur tashmë në qiellin e natës. E zbuluar vitin e kaluar, kometa Tsuchinshan-Atlas është parë tashmë në hemisferën veriore pasi ka mahnitur vëzhguesit e qiellit më herët në hemisferën jugore. Drita e hënës do të mbulojë disi një pjesë të bishtit të kometës, por spektakli do të jetë mahnitës pas perëndimit të diellit, tha Bill Cooke nga NASA. “Shumica e astronomëve nuk e pëlqejnë hënën e plotë sepse drita e saj e fortë pengon vëzhgimin e objekteve të tjera. Kështu që është pak e vështirë për ne që të entuziazmohemi për të, pavarësisht se është superhëna më e madhe e vitit 2024,” tha ai. Astronomët, këshillojnë sidoqoftë, që të kërkohet në qiell kometa, pasi ajo mund edhe të mos kthehet kurrë më. Sa për superhënën, do të ketë edhe një tjetër pas saj këtë vit. Superhëna e katërt dhe e fundit e 2024-ës do të mund të shihet më 15 nëntor.