14 korriku në Bruksel do të jetë një ditë intensive, ndërsa qarqet diplomatike e njohin si “Super e Marta”, sepse do të mbahen katër konferenca ndërqeveritare, duke hapur ose mbyllur përkohësisht kapituj bisedimesh. Shqipëria dhe Mali i Zi do të mbyllin kapitujt e radhës për anëtërsimin në bllokun evropian. Shqipëria do të mbyllë tre kapituj, 25, 26 dhe 30, ndërsa Mali I Zi do t’i mbyllë përkohësisht dy kapituj, 8 dhe 29. Radio Evropa e Lirë shkruan se përveç Malit të Zi dhe Shqipërisë, konferenca ndërqeveritare do të mbahen edhe me Ukrainën dhe Moldavinë. Me këtë rast, këto dy vende do të hapin nga një kapitull. Nga të gjitha gjashtë vendet e Ballkanit Perëndimor, Shqipëria dhe Mali i Zi vlerësohet se kanë përparuar dukshëm në rrugën drejt anëtarësimit në BE, dhe janë në bisedime aktive. Kurse Serbia, Maqedonia e Veriut dhe Bosnja e Hercegovina kanë statusin e vendit kandidat. I vetmi vend nga rajoni pas statusin e vendit kandidat është Kosova, dhe pse ka aplikuar rreth katër vite më parë. Ndërkohë, institucionet evropiane kërkuan të organizonin gjithsej pesë konferenca ndërqeveritare në të njëjtën ditë, pasi fillimisht shpresohej që edhe Serbisë do t’i jepej drita e gjelbër për të hapur kapitullin 3.Megjithatë, nuk pati pajtueshmëri midis shteteve anëtare për të mbajtur konferencën e pestë ndërqeveritare, pasi një numër i madh i tyre ishin kundër zhbllokimit të procesit të negociatave me Serbinë. Mali i Zi, i cili është vendi kandidat më i përparuar në bisedimet për anëtarësim në Bashkimin Evropian, do të ketë 18 nga gjithsej 33 kapituj negociatash të mbyllur përkohësisht pas konferencës së ardhshme ndërqeveritare. Irlanda, e cila mban presidencën e Këshillit të Bashkimit Evropian deri më 31 dhjetor të këtij viti, synon t’i përfundojë bisedimet për pranim me Malin e Zi gjatë presidencës së saj gjashtëmujore.