Vendosmëria e Izraelit për të sulmuar Iranin dhe siguria se trupat amerikane do të ishin në shënjestër në përgjigje e detyruan administratën Trump të ndërmerrte sulme parandaluese, tha sekretari i shtetit, Marco Rubio, në një shpjegim të ri për hyrjen e papritur të Uashingtonit në konflikt. Arsyetimi shkaktoi vlerësime të ndara nga anëtarët e lartë të Kongresit, të cilët të hënën në mbrëmje morën informimin e parë nga administrata Trump që kur urdhëroi fillimin e fushatës ajrore gjatë fundjavës. Rubio, drejtori i CIA-s John Ratcliffe, dhe shefat e përbashkët të shtabeve, folën me ligjvënësit pas dyerve të mbyllura në Kapitol përpara një votimi që pritet më vonë këtë javë në Dhomën e Përfaqësuesve mbi një rezolutë për fuqitë e luftës që paraqet një mundësi të pamundur për ta detyruar Trumpin të përfundojë luftën kundër Iranit. “Ishte shumë e qartë se nëse Irani sulmohej nga kushdo ai do të kundërpërgjigjej, dhe do të kundërpërgjigjej kundër Shteteve të Bashkuara”, u tha Rubio gazetarëve në Kapitol. “Ne e dinim se do të kishte një veprim izraelit. Ne e dinim se kjo do të përshpejtonte një sulm kundër forcave amerikane, dhe e dinim se nëse nuk do t’i godisnim para se të nisnin ato sulme, do të pësonim viktima më të shumta”. Zëvendës presidenti JD Vance tha ndërkohë në një intervistë në Fox Neës të hënën në mbrëmje se qëllimi i SHBA-së ishte të sigurohej që “Irani nuk do të mund të shtinte në dorë kurrë një armë bërthamore”. “Presidenti dëshiron t’ua bëjë të qartë iranianëve dhe botës se ai nuk do të pushojë derisa të arrijë atë objektiv kaq të rëndësishëm për të siguruar që Irani të mos ketë një armë bërthamore”, tha ai. Vance ka qenë anëtari i administratës së Donald Trump më kundër ndërhyrjeve ushtarake dhe ka folur më rrallë për veprimet e SHBA-së në Iran sesa Rubio. Reagimet ndaj shpjegimit të administratës për hyrjen në luftë janë ndarë sipas vijave partiake, me republikanët që nxituan të mbronin Trumpin, ndërsa demokratët dënuan atë që e shohin si një konflikt të panevojshëm me qëllime të paqarta.