Kreu i PD, Sali Berisha në konferencën tradicionale të përditshme për shtyp të mesditës, ka njoftuar këtë të premte datën e protestës së ardhshme. Berisha njoftoi se më 26 nëntor do të jetë protesta e radhës kombëtare e PD. “Asnjë diskutim që ka kombinim. Sepse gjykata është në varësi të Spakut, që i kontrollon dhe shpërndan foto e materiale për ta. Pra, këta janë një trupë, një korporatë kriminale që kontrollohen nga krimi dhe Edi Rama. Shumë evidente ajo që thoni ju! Me datën 26 është protesta tjetër kombëtare, më e fuqishmja që ka njohur Shqipëria. Ndaj ftoj shqiptarët me datë 26, marshim në Tiranë. E gjithë Shqipëria në Tiranë. Ora do të njoftohet. Nuk ka tërheqje. Mosbindja civile është rruga e vetme e ndarjes nga kjo diktaturë.” Njoftimi i protestës së PD, vjen një ditë pas dhënies së vendimit të Gjykatës Kushtetuese, ku pas një séance maratonë prej afro 7 orësh, rrëzoi Sali Berishën duke e cilësuar të ligjshme masën e sigurisë “Detyrim Paraqitje” së vendosur ndaj tij.