Tre ndërtesa banimi të lidhura me partinë qeverisëse të Greqisë u sulmuan në qytetin verior të Selanikut para agimit të së mërkurës, duke plagosur pesë persona, përfshirë një kandidate për në parlament, tha policia. Kandidatja e partisë qeverisëse të qendrës së djathtë, Demokracia e Re, dhe nëna e saj pësuan djegie, tha një zyrtar i policisë. Sulmuesit e panjohur lëshuan koktejle molotov duke i vënë zjarrin tre ndërtesave, para orës 5:00 të mëngjesit. Dy sulmet e para çuan në shpërthime që shkaktuan vetëm dëme materiale, ndërsa i treti plagosi pesë persona dhe dëmtoi dy makina dhe dy motoçikleta, tha një nga zyrtarët. Dy nga ndërtesat e synuara përfshinin apartamente në të cilat banonin figura të Demokracisë së Re, ndërsa e treta ishte në pronësi të një politikani lokal nga partia. Nuk kishte asnjë pretendim të menjëhershëm për përgjegjësinë për sulmet. Greqia ka një histori të gjatë dhjetëravjeçare të sulmeve me bomba dhe zjarrvënie ndaj politikanëve, megjithëse vitet e fundit incidente të tilla kanë patur tendencë të shkaktojnë vetëm dëme materiale. Demokracia e Re dhe zëdhënësi i qeverisë, Pavlos Marinakis, dënuan sulmet e së mërkurës dhe thanë se qeveria ishte e vendosur të merrte masa të ashpra ndaj një dhune të tillë.