Dy cisterna raportohet se janë sulmuar pranë Ngushticës së Hormuzit, tha të shtunën një agjenci detare britanike, ndërsa tensionet midis Uashingtonit dhe Teheranit për rajonin vazhdojnë të rriten. Sipas UKMTO-së, një anije ishte "goditur nga një predhë e panjohur" ndërsa ndodhej në verilindje të brigjeve të Limës, në Oman, duke shkaktuar dëme në dhomën e motorëve. Nuk janë raportuar të lënduar deri më tani. Rreth tre orë më vonë, agjencia tha se kishte marrë një raport për një incident të dytë, këtë herë në verilindje të Khasabit në Oman. "Kapiteni i një cisterne raporton se ka patur një shpërthim në afërsi të anijes", tha ajo në një paralajmërim, duke shtuar se nuk ishte raportuar asnjë dëmtim në anije në atë kohë. Agjencia i këshilloi anijet në rajon të veprojnë me kujdes dhe të njoftojnë çdo aktivitet të dyshimtë. Ngushticaa e Hormuzit, e cila lidh Gjirin Persik me Gjirin e Omanit dhe Detin Arabik, është një nga pikat më të rëndësishme të tranzitit të naftës dhe gazit në botë, duke transportuar afërsisht një të katërtën e tregtisë globale të naftës detare. Teherani e mbylli rrugën ujore pas sulmeve të SHBA-së dhe Izraelit ndaj Iranit në fund të shkurtit, dhe që atëherë Ngushtica është bërë një faktor kyç në konfliktin e vazhdueshëm. Të premten, ushtria amerikane hodhi poshtë pretendimet se Irani e kishte rimbyllur Ngushticën, duke thënë se ajo mbetet "e hapur për tranzitin e anijeve tregtare". "Irani nuk e kontrollon atë. Mijëra anije kanë lundruar nëpër rrugën ujore ndërkombëtare gjatë katër muajve të fundit", tha Komanda Qendrore amerikane.