Policia gjermane ka arrestuar një 15-vjeçar të dyshuar se ka lidhje me sulmin fatal me thikë në perëndim të vendit, ku tre persona mbetën të vrarë dhe disa të tjerë u plagosën. 15-vjeçari nuk dyshohet si autor i krimit, por akuzohet se ka dijeni për sulmin, që kancelari Olaf Scholz e konsideroi një akt të tmerrshëm terrorist. Në një konferencë shtypi të shtunën, hetuesit thanë se terrorizmi nuk përjashtohej si një motiv dhe se kërkimet për autorin po kryheshin në të gjithë vendin. 15-vjeçari i lidhur me rastin u ndalua mëngjesin e së shtunës pasi dy gra raportuan se kishin dëgjuar një bisedë mes tij dhe një personi të dytë në të cilin diskutonin për sulmin, tha policia. Ai u izolua në paraburgim dhe u mor në pyetje nga autoritetet, teksa vijojnë përpjekjet për të identifikuar autorin që goditi me thikë kalimtarë të rastit gjatë një festivali për të festuar 650 vjetorin e themelimit të qytetit industrial të Solingenit. Nga sulmi mbetën të vdekur dy burra, 56 dhe 67 vjeç dhe një grua 56-vjeçare.