Marina amerikane dhe britanike ka zbrapsur sulmin më të madh deri më sot nga rebelët Houthi të Jemenit mbi anijet tregtare në detin e kuq. Grupi i mbështetur nga Irani, lëshoi 18 dronë dhe tre raketa mbrëmjen e kaluar, sipas ushtrisë amerikane. Të gjithë ata u rrëzuan nga luftanijet dhe avionët luftarakë amerikanë dhe britanikë në rajon dhe nuk është raportuar për të lënduar apo dëme. Rebelët Houthi nuk kanë bërë komente deri më tani por ata kanë vendosure në shënjestër anije të shumta tregtare si reagim ndaj luftës në rripin e gazës. Ata kanë pretenduar, shpesh edhe pa asnjë bazë, se anijet kanë qenë të lidhura me Izraelin. Ushtria amerikane tha se sulmi i të martës ishte i 26-ti që nga 19 nëntori. SHBA, Britania e Madhe dhe 10 vende të tjera, kanë paralajmëruar Houthit që t’i japin fund menjëherë sulmeve, që ata thonë se janë të paligjshëm dhe përbëjnë një kërcënim të drejtpërdrejtë për lirinë e lundrimit në një trajektore të rëndësishme detare nga e cila kalon 15 për qind e tregtisë globale. Aleatët, deri më tani nuk kanë goditur shënjestra në pjesën e Jemenit të kontrolluar nga rebelët në shenjë hakmarrjeje, por sekretari britanik i mbrojtjes, Grant Shapps, paralajmëroi të mërkurën se nëse sulmet vazhdojnë Houthit do të përballen me pasoja.