Një sulm nga SHBA ndaj një aleati të NATO-s do të thoshte fundi si i aleancës ushtarake por edhe i "sigurisë pas Luftës së Dytë Botërore", paralajmëroi udhëheqësja e Danimarkës, pasi Donald Trump kërcënoi përsëri se do të pushtonte Groenlandën. Menjëherë pas operacionit të tij ushtarak në Venezuelë, presidenti amerikan tha të dielën se SHBA kishte nevojë për Groenlandën "shumë", duke ripërtërirë frikën e një pushtimi amerikan të ishullit kryesisht autonom, i cili është një ish-koloni daneze dhe mbetet pjesë e mbretërisë daneze. Politika e jashtme dhe e sigurisë e Groenlandës vazhdon të kontrollohet nga Kopenhageni. Mette Frederiksen, kryeministrja daneze, paralajmëroi ndërkohë se çdo sulm i SHBA-së ndaj një aleati të NATO-s do të ishte fundi i "gjithçkaje". "Nëse Shtetet e Bashkuara vendosin të sulmojnë ushtarakisht një vend tjetër të NATO-s, atëherë gjithçka do të ndalet, kjo përfshin NATO-n dhe rrjedhimisht edhe sigurinë pas Luftës së Dytë Botërore", tha Frederiksen. Vendndodhja strategjike e Groenlandës mes Evropës dhe Amerikës së Veriut e bën atë një vend kritik për sistemin amerikan të mbrojtjes nga raketat balistike. Burimet e rëndësishme minerale të ishullit përputhen gjithashtu me ambicien e Uashingtonit për të zvogëluar varësinë nga eksportet kineze. Komentet e Frederiksen erdhën pasi kryeministri i Groenlandës, Jens-Frederik Nielsen i kërkoi Trumpit të hiqte dorë nga "fantazitë e tij për aneksim" dhe akuzoi SHBA-në për retorikë "krejtësisht të papranueshme", duke deklaruar: "Mjaft më".