Disa persona janë vrarë dhe plagosur të martën, si pasojë e valës së re të sulmeve ruse me raketa në qytetet ukrainase, përfshirë kryeqytetin Kievi. Sistemet e alarmeve janë aktivizuar në gjithë territorin e Ukrainës. Në Kiev, të paktën një grua është vrarë dhe nëntë persona tjerë janë plagosur, ka thënë kryetari i kryeqytetit Vitali Klitschko në platformën Telegram. Tre distrikte – Peçerks, Sviatoshinsk dhe Solomjansk – janë vënë në shënjestër të sulmeve ruse, tha Klitschko. Sipas tij, tetë persona janë shtruar në spital. Në Harkiv, qytetin e dytë më të madh të Ukrainës, raketat ruse Kh-22 kanë goditur shënjestra civile, ka thënë guvernatori rajonal Oleh Synyehubov, po ashtu, në Telegram. “Si rezultat, 28 persona janë plagosur. Dy gra, 56 dhe 40 vjeçe, fatkeqësisht, janë vrarë”, tha ai, duke publikuar pamje të ndërtesave krejtësisht të shkatërruara. Raketat ruse kanë goditur edhe qytetin Pavlohrad, në rajonin jugor të Dnjipropetrovskut, duke vrarë të paktën një person. Javët e fundit, Rusia ka intensifikuar sulmet me raketa mbi shënjestrat civile në Ukrainë, duke shkaktuar një mori vdekjesh, plagosjesh dhe dëmesh materiale. Qyteti i Harkivit është goditur vecanërisht rëndë. Sipas zyrtarëve ukrainas, vetëm në periudhën 29 dhjetor 2023 – 2 janar 2024, Rusia ka lëshuar më shumë se 500 dronë të prodhuar nga Irani në qytetet ukrainase. Kjo valë sulmesh ka rritur presionin mbi kapacitetet ajrore për mbrojtjen e Ukrainës, dhe rezervat e municioneve, për çka presidenti ukrainas, Volodymyr Zelensky ka shtuar thirrjet ndaj aleatëve që të ndihmojnë Kievin.