Donald Trump po shqyrton mundësinë e nisjes së një raundi të ri sulmesh “të shkurtra dhe të fuqishme” kundër Iranit për të zhbllokuar më në fund Ngushticën e Hormuzit. Kjo vjen mes raporteve se SHBA-të janë gati të përdorin raketën kërcënuese Hipersonike Dark Eagle me Rreze të Gjatë veprimi, e që kushton 15 milionë dollarë, kundër Iranit për herë të parë. Komandanti i Centcom, Admirali Brad Cooper, pritet t'i japë Trump një sërë opsionesh të reja për të liruar ngushticën e Hormuzit, raporton Axios. Takimi ka ngjallur spekulime se presidenti amerikan po shqyrton seriozisht një raund të ri sulmesh shkatërruese para se t'i japë fund luftës. Thuhet se Cooper ka përgatitur plane për një valë sulmesh “të shkurtra dhe të fuqishme”, duke shpresuar se kjo më në fund do ta thyejë Teheranin dhe do ta detyrojë të heqë dorë nga bllokada e rrugës kryesore ujore, thonë raportet. Trump pritet gjithashtu të informohet mbi planet sipas të cilave SHBA do të marrë nën kontroll ngushticën me forca tokësore dhe për një operacion të forcave speciale për të siguruar rezervat e uraniumit të pasuruar të Iranit. Planet e propozuara të sulmit vijnë mes raporteve se ushtria amerikane po shqyrton mundësinë e dërgimit të raketave hipersonike me rreze të gjatë veprimi në Lindjen e Mesme. Raketa Dark Eagle mund të përdoret për të goditur lëshuesit e fshehtë të raketave iraniane. SHBA ka pasur vështirësi në goditjen e këtyre objektivave pasi raketat precize që përdoren aktualisht kanë një rreze maksimale prej rreth 500 km. Nga ana tjetër, Dark Eagle ka një rreze veprimi prej rreth 2700 km dhe mund të arrijë shpejtësi deri në Mach 5. Nëse miratohet plani, kjo do të shënonte herën e parë që SHBA përdor një raketë hipersonike e cila ende nuk është shpallur plotësisht funksionale. Çdo raketë raportohet se kushton afërsisht 15 milionë dollarë dhe aktualisht nuk ka më shumë se tetë prej tyre, thanë burimet për Bloomberg.