Ukraina raportohet se ka kryer një sulm rekord me dron, brenda Rusisë, nga mbi 1900 kilometra larg. E duket se kjo ishte një dhuratë për ditëlindjen e 73-të të presidentit Vladimir Putin. Tre dronë kamikazë me rreze të gjatë veprimi thuhet se u lëshuan mbi një rafineri nafte, në qytetin siberian të Tyumenit, thellë brenda rusisë, nga territori ukrainas. Analistët pretendojnë se ky është sulmi më i largët me dronë, që nga fillimi i luftës. Qyteti ndodhet 1930 km larg nga kufiri i Ukrainës me Rusinë. Rekordi i mëparshëm ishte 1780 km dhe u vendos në gusht të këtij viti. Megjithatë ukraina ka shkuar edhe më thellë në rusi, në qershor të këtij viti, kur goditi bazën ajrore Belaya, në siberinë lindore. Por ky sulm ishte pjesë e operacionit mbresëlënës të Kievit, “Rrjeta e Merimangës”, që përfshinte disa sulme me rreze të gjatë veprimi me qëllim ndëshkimin e Putinit. Por, ndërsa ukrainasit festojnë sulmin, Moska u përpoq të minimizonte shkallën e dëmit. Zyrtarët rusë pretenduan se rrëzuan të tre dronët ukrainas dhe nuk u raportua asnjë zjarr, viktimë apo shpërthim. Kjo vjen pavarësisht imazheve që tregojnë një strukturë të shkatërruar në qytet me mbetje të djegura të shpërndara në tokë dhe panele të shkëputura nga ndërtesa.