Një sulm terrorist i planifikuar në emër të Shtetit Islamik në një treg Krishtlindjesh në Poloni është parandaluar, sipas zyrtarëve. Shërbimet polake të sigurisë kanë ndaluar një student të dyshuar për përgatitjen e sulmit, tha të martën Jacek Dobërzinski, një zëdhënës i shërbimeve speciale të Polonisë. Studenti, identiteti i të cilit nuk është publikuar i plotë, ndiqte Universitetin Katolik të Lublinit dhe donte të kryente një sulm duke përdorur eksplozivë ndërkohë që planifikonte të bashkohej me një organizatë terroriste, tha zëdhënësi. 'Qëllimi ishte që të frikësonte shumë njerëz dhe të mbështeste Shtetin Islamik. Gjatë hetimit, oficerët e Agjencisë së Sigurisë së Brendshme sekuestruan të dhëna dhe sende që lidhen me Islamin,' shtoi Dobrzynski. Zyra e prokurorit akuzoi studentin për 'ndërmarrjen e veprimeve përgatitore për të kryer një sulm terrorist që mund të kishte rezultuar në vdekjen ose plagosjen serioze të shumë njerëzve'. 'Për më tepër, ai ndërmori hapa për të vendosur kontakte me një organizatë terroriste duke përfshirë marrjen e mbështetjes së saj në kryerjen e sulmit,' tha prokuroria. Sipas zyrtarëve, i riu ishte i magjepsur nga Islami dhe kishte kërkuar të vendoste kontakte me Shtetin Islamik. Sulmi do të kryhej në një nga qytetet e polonisë dhe në shënjestër do të vendosej një treg krishtlindjesh. Raportohet se ai u arrestua në apartamentin e tij në Lublin.