Suedia do ta rrisë alarmin për terrorizëm në nivelin e dytë më të lartë, ka thënë e përditshmja suedeze, Dagens Nyheter të enjten, pas djegies dhe akteve tjera kundër Kuranit, që i kanë zemëruar myslimanët. Shërbimi i sigurisë SAPO planifikon të rrisë nivelin e paralajmërimit nga 3 në 4, që nënkupton se ekziston kërcënim konkret për sulm, ka raportuar gazeta. Britania dhe Shtetet e Bashkuara i kanë paralajmëruar ndërkohë shtetasit e tyre që të mos shkojnë në Suedi, për shkak të mundësisë së sulmeve terroriste, pas protestave që janë mbajtur në këtë vend dhe në Danimarkën fqinje, lidhur me djegiet dhe dëmtimet e kopjeve të Kuranit nga aktivistët kundër Islamit. Suedia dhe Danimarka janë dy prej vendeve më liberale në botë, dhe kanë lejuar për një kohë të gjatë kritikat për fenë. Por, myslimanët e konsiderojnë Kuranin si libër të shenjtë dhe dëmtimin e qëllimshëm të tij e shohin si fyerje të madhe që meriton ndëshkim të rëndë. Në 2017, një imigrant uzbek, i cili kishte lidhje me grupin ekstremist Shteti Islamik, përplasi me kamion disa këmbësorë në rrugët e Stokholmit, duke lënë pesë persona të vdekur.