Ratifikimi i aplikimit të Suedisë për anëtarësim në NATO nga ana e Hungarisë është tani “vetëm çështje teknike”, tha të martën ministri i Jashtëm i Hungarisë Peter Szijjarto, pasi Turqia ra dakord të lejojë shtetin nordik që të bashkohet me aleancën ushtarake. Të hënën, Turqia pranoi që të lejojë Suedinë që t’i bashkohet NATO-s, duke u mundësuar aleatëve që të shfaqin unitetin e tyre, në një samit që i kushtohet kryesisht forcimit të mbështetjes për Ukrainën përballë pushtimit të Rusisë. Hungaria dhe Turqia janë anëtarët e fundit të NATO-s që nuk e kanë ratifikuar ende pranimin e Suedisë në aleancë. Parlamenti i Hungarisë e ka përfunduar këtë sesion parlamentar dhe është në pushimet e verës, por mund të thirret një mbledhje e re në ditët në vijim për të vazhduar me votimin. Kryeministri Viktor Orban përsëriti të premten e kaluar se Budapesti mbështet aplikimin e Suedisë. "Ne jemi në kontakt të vazhdueshëm si me sekretarin e përgjithshëm të NATO-s ashtu edhe me Turqinë", tha ai. "Nëse shohim se kemi diçka për të bërë, do ta bëjmë. Hungaria nuk njihet për zvarritje nëse duhet të marrim një vendim", tha ai. Bllokimi i presidentit turk Rexhep Tajip Erdogan në ofertën e anëtarësimit të Suedisë kishte hedhur një re mbi përgatitjet për samitin e NATO-s të së martës, por vendet i zgjidhën dallimet e tyre në bisedimet e orëve të vona në Vilnius.