Një valë stuhish të fuqishme ka përfshirë Ballkanin, duke shkaktuar dëme të konsiderueshme materiale dhe duke vënë në alarm autoritetet në disa vende të rajonit. Më e goditura ka qenë Maqedonia e Veriut, ku vetëm pak minuta stuhi mjaftuan për të paralizuar pjesë të mëdha të Shkupit. Erërat e forta, reshjet intensive dhe breshëri rrëzuan pemë e semaforë, dëmtuan automjete dhe shkëputën çatitë e disa ndërtesave. Në shumë zona u bllokua qarkullimi rrugor, ndërsa u regjistruan edhe ndërprerje të energjisë elektrike. Bilanci paraprak flet për 9 persona të lënduar, dy prej të cilëve në gjendje të rëndë. Kryebashkiaku i Shkupit ka bërë të ditur se autoritetet kanë marrë mbi 1.000 thirrje për ndihmë nga qytetarët. Më shumë se 50 ekipe dhe rreth 1.000 punonjës të ndërmarrjeve publike janë angazhuar në terren për largimin e pemëve të rrëzuara, hapjen e rrugëve të bllokuara dhe rikthimin e normalitetit.