Dhjetëra fluturime janë anuluar në Aeroportin e Frankfurtit në Gjermani, si pasojë e shiut të rrëmbyer që ka bërë që të përmbyten disa pjesë të pistës. Një zëdhënës i aeroportit ka thënë të enjten për agjencinë e lajmeve dpa se, akumulimi i madh i ujit në disa pjesë të aeroportit, në pistë, në zonën ku parkohen aeroplanët, dhe ku bëhen gati për fluturime, i ka detyruar autoritetet që shumë fluturime t’i anulojnë, apo t’u ndryshojnë orarin. Shërbimet tokësore në aeroportin më të madh të Gjermanisë janë pezulluar për më shumë se dy orë, çka nënkupton që më shumë se 34 avionë nuk kanë mundur të nisen me kohë në destinacionet e tyre. Shumë fluturime janë anuluar edhe prej vetë kompanive ajrore. Shërbimi Gjerman për Motin, lëshoi të mërkurën një paralajmërim për stuhi për gjithë landin Hesen, ku gjendet Frankfurti. Ka pasur ndërkohë raporime për përmbytje të izoluara në shumë bodrume shtëpish në këtë land.