Moti i keq që përfshiu zonatë mëdha në Qarkun e Elbasanit dhe në Juglindjen e vendit ka shkaktuar dëme të konsiderueshme në bujqësi dhe pemtore. Në Elbasan dëmet më të mëdha raportohen nga njësia administrative e Zavalinës, ku sipas banorëve rrebeshet me breshër dhe erërat e forta kanë shkaktuar dëme të pariparueshme te të mbjellat, kryesisht vreshtari dhe pemëtari të tjera. Banorët thonë se rrebeshi i breshërit ka zgjatur pak minuta, por ka qenë aq i dendur sa ka zhveshur pemët frutore nga gjethet dhe ka shkatërruar plotësisht prodhimin e këtij viti. Pemët e mollëve, kumbullave dhe vreshtat e rrushit, të cilat ishin në fazën e rritjes së frutit, janë dëmtuar pothuajse 100 për qind. Dëme të konsiderueshme janë raportuar edhe në fshatrat e Pogradecit dhe fshatrat e Korçës, ku sipas fermerëve kostoja e tyre arrin në miliona lekë.