Moti i keq që përfshiu Greqinë Perëndimore dhe ishullin e Korfuzit mbrëmjen e së shtunës ka shkaktuar dëme të mëdha në disa qztete, ndërsa fatmirësisht nuk u raportuan viktima në njerëz. Stuhia la pas shkatërrime të mëdha në disa qytete, me dëmet më të rënda të regjistruara në Korfuz, Kostur, Grevena, Kozan dhe Janinë. Në Korfuz, brenda vetëm një ore ranë 126 milimetra shi, duke e kthyer qytetin në një liqen. Rrugët u përmbytën, dyqane u dëmtuan rëndë në zonën e Spilias, ndërsa rruga drejt aeroportit u bë e pakalueshme për orë të tëra. Probleme të mëdha pati edhe në qarkullimin ajror, pasi 29 fluturime u anuluan ose devijuan në Aktio, Selanik e Janinë. Në Kostur stuhia shkaktoi dëme në kulturat bujqësore por edhe në qytet. Era me shpejtësi mbi 100 kilometra në orë shkuli pemë, shkatërroi prodhimin e fasuleve dhe mollëve, ndërsa qindra familje mbetën pa energji elektrike për orë të tëra. Disa automjete u dëmtuan kur pemët ranë mbi to, ndërsa rrugë të tëra u bllokuan.