Një stuhi e fuqishme dimërore po godet disa pjesë të SHBA-së, duke lënë të paktën 20 të vdekur dhe qindra mijëra pa energji elektrike. Vdekje janë raportuar në Nju Jork, Tenesi, Luiziana, Masaçusets, Kansas, Pensilvani dhe Teksas. Më shumë se 10,000 fluturime janë anuluar ose vonuar dhe shkollat ​​dhe rrugët në të gjithë vendin janë mbyllur. Mijëra persona raportohet të kenë mbetur pa energji elektrike. Autoritetet kanë paralajmëruar se mund të ketë reshje të shumta bore dhe akull për disa ditë. Stuhia besohet se ka prekur mbi 180 milionë amerikanë, që do të thotë më shumë se gjysmën e popullsisë. Ekspertë të motit kanë paralajmëruar që një nga rreziqet më të mëdha të stuhisë është akulli, i cili mund të dëmtojë pemët, të këpusë kabllot e energjisë dhe t’i bëjë rrugët të pasigurta. Në Virxhinia dhe Kentuki, autoritetet kanë reaguar ndaj qindra aksidenteve rrugore. Kanadezët janë goditur gjithashtu nga reshjet e dendura të borës dhe qindra fluturime janë anuluar. Zyrtarët vlerësojnë se do të ketë 15-30 cm reshje bore në provincën e Ontarios. Thuajse gjysma e shteteve amerikane kanë shpallur gjendje të jashtëzakonshme dhe shkollat në të gjithë vendin tashmë po anulojnë mësimin në pritje të stuhisë që do të vazhdojë edhe përtej të hënës. Ndërsa vendet në veri si Dakotat dhe Minesota janë mësuar me temperatura nën zero në dimër, është e pazakontë të shohësh një të ftohtë kaq ekstrem në shtete si Teksasi, Luiziana dhe Tenesi, ku temperaturat janë rreth 15-20 gradë Celsius nën mesataren sezonale.