Finlanda mban pozicionin e saj të parë si vendi më i lumtur në botë për të nëntin vit radhazi, pasi shënoi 7.764 pikë nga 10 pikët maksimale, sipas një raporti vjetor të sponsorizuar nga OKB-ja. Banorët në Helsinki thonë se kjo vjen për shkak të natyrës, kulturës dhe sistemit arsimor me cilësi të lartë të vendit. Profesori i politikave sociale dhe shëndetësore në Universitetin e Tampere-s, Juho Saari, shton se rezultati, i cili vjen ndërsa vendi po njeh papunësi të lartë, borxh qeveritar në rritje dhe shkurtime të mëdha të përfitimeve sociale dhe të mirëqenies, tregon se "politika nuk ka aq shumë rëndësi". E njohur për mijëra liqenet, kulturën e saunës dhe sistemin e gjerë të mirëqenies, 5.6 milionë banorët e Finlandës në përgjithësi raportojnë një nivel të lartë besimi tek autoritetet dhe nivele të ulëta pabarazie. Midis 147 vendeve të listuara, nivelet më të ulëta të kënaqësisë me jetën u raportuan nga Afganistani i shkatërruar nga lufta, ku talebanët që u rikthyen në pushtet në vitin 2021, janë akuzuar për shkelje të të drejtave të njeriut dhe keqtrajtim të grave. Bazuar në një mesatare trevjeçare, indeksi i lumturisë merr në konsideratë gjashtë faktorë: Produktin e Brendshëm Bruto për frymë, jetëgjatësinë, mbështetjen sociale, lirinë për të bërë zgjedhje në jetë, bujarinë dhe perceptimet e korrupsionit. Vendet nordike vazhdojnë të dominojnë renditjen, me Islandën, Danimarkën, Suedinë dhe Norvegjinë që i bashkohen Finlandës në marrjen e pesë nga gjashtë vendet e para këtë vit. Kosta Rika u rendit e katërta, duke hyrë në pesëshen e parë për herë të parë dhe duke shënuar kështu renditjen më të lartë ndonjëherë për një vend të Amerikës Latine. Ndërkohë, sipas OKB-së, përdorimi i tepërt i mediave sociale po dëmton mirëqenien e të rinjve në shumë vende.