Ukraina ka lëshuar dhjetëra dronë në drejtim të Moskës, duke detyruar kryeqytetin rus të mbyllë përkohësisht tri aeroporte, thanë zyrtarët rusë të dielën. Kryebashkiaku i Moskës, Sergei Sobyanin, tha se forcat ruse rrëzuan 32 dronë ukrainas që sulmuan Moskën gjatë natës dhe mëngjesit të së dielës, gjatë njërit prej sulmeve më të mëdha kundër kryeqytetit që kur forcat e Kremlinit pushtuan Ukrainën më 2022. “Sipas të dhënave fillestare, nuk ka dëme apo viktima në vendin ku kanë rënë mbetjet e dronëve. Ekipet emergjente janë në vendin e ngjarjes”, tha Sobyanin në Telegram. Rosaviatsia, agjencia federale e transportit ajror e Rusisë, njoftoi se aeroportet Sheremetyevo, Domodedovo dhe Zhukovo i kanë ndaluar përkohësisht operacionet "për të garantuar siguri për fluturimet e avionëve civilë", për shkak të sulmeve me dronë. Agjencia shtetërore e lajmeve, TASS, raportoi duke cituar Rosaviatsian se aeroportet rifilluan operacionet disa orë më vonë. Një person u plagos gjatë sulmit, sipas guvernatorit të rajonit të Moskës, Andrei Vorobyov. Mediat raportuan se sulmet shkaktuan zjarr në një fshat të distriktit Ramenskoye, duke u vënë zjarrin disa shtëpive. Rusia raporton për shkatërrimin e dronëve ukrainas pothuajse çdo ditë, por sulmet rrallëherë kanë në shënjestër kryeqytetin. Autoritetet ukrainase kanë deklaruar shpesh se sulmet e tyre me dronë në Rusi synojnë infrastrukturën që është e rëndësishme për përpjekjet e luftës së Moskës dhe janë përgjigje ndaj sulmeve të vazhdueshme të Rusisë kundër Ukrainës. Nga fillimi i luftës, Ukraina është përballur me bombardime gjatë natës nga Rusia, e cila, mes të tjerash, ka si synim shkatërrimin e infrastrukturës jetike energjetike. Forca Ajrore e Ukrainës tha ndërkohë të dielën se i rrëzoi 62 nga një numër rekord prej 145 dronësh rusë të lëshuar gjatë natës. Forca ajrore tha se humbi gjurmët e 67 dronëve, ndërsa 10 të tjerë u larguan nga Ukraina në drejtim të Rusisë, Moldavisë dhe Bjellorusisë. Të paktën dy persona u plagosën dhe u dëmtuan ndërtesa në sulmin e fundit me dronë rusë në rajonin jugor të Odesës, thanë zyrtarët ukrainas.