Ukraina kreu një sulm të madh me dron gjatë natës në Rusi, duke detyruar aeroportet në pjesën jugore të vendit që të ndërpresin fluturimet të mërkurën në mëngjes dhe duke detyruar evakuimin e banorëve nga dhjetëra apartamente në rajonin e Rostovit, thanë zyrtarët rusë. Ministria ruse e mbrojtjes tha në një postim në aplikacionin e mesazheve Telegram se njësitë e saj të mbrojtjes ajrore shkatërruan 158 dronë ukrainas gjatë natës, duke përfshirë 29 mbi rajonin jugor të Rostovit. Nuk ka raportime të menjëhershme për të lënduar, por banorët nga 48 apartamente në një ndërtesë në qytetin Rostov të Aksay-t u evakuuan për shkak të kërcënimit nga një shpërthim i mundshëm i një droni të rënë, tha guvernatori në detyrë i rajonit në Telegram. Ministria e Mbrojtjes tha se 69 nga dronët u shkatërruan mbi rajonin Krasnodar në Kaukazin e Veriut dhe 15 mbi Osetinë e Veriut. Ministria ruse sidoqoftë raporton vetëm numrin e dronëve të shkatërruar dhe nuk tregon se sa dronë janë lëshuar drejt vendit. Mbikëqyrësi rus i aviacionit civil Rosaviatsia tha se disa aeroporte në jug të Rusisë u mbyllën herët të mërkurën për të garantuar sigurinë ajrore. Nuk ka pasur asnjë koment të menjëhershëm nga Ukraina në lidhje me sulmet. Por kievi thotë se sulmet e tij mbi rusi janë përgjigje të bombardimeve të vazhdueshme të Moskës ndaj Ukrainës.