Stuhia diellore jashtëzakonisht e fortë që goditi Tokën prodhoi shfaqje mahnitëse ngjyrash në qiellin e hemisferës veriore të shtunën. Administrata Kombëtare Oqeanike dhe Atmosferike e SHBA (NOAA) lëshoi një paralajmërim të rrallë për stuhi gjeomagnetike kur një shpërthim diellor arriti në Tokë të premten pasdite, disa orë më shpejt nga sa ishte parashikuar. Efektet e Dritave Veriore, të cilat u shfaqën dukshëm edhe në shumë rajone të pazakonta, do të zgjasin gjatë gjithë fundjavës dhe ndoshta deri në javën e ardhshme. NOAA njoftoi operatorët e termocentraleve dhe anijeve kozmike në orbitë, si dhe Agjencinë Federale të Menaxhimit të Emergjencave, për të marrë masa paraprake. "Për shumicën e njerëzve këtu në planetin Tokë, ato nuk do të duhet të bëjnë asgjë," tha Rob Steenburgh, një shkencëtar me Qendrën e Parashikimit të Motit Hapësinor të NOAA. Foto të fenomenit spektakolar u kapën gjithashtu në disa pjesë të Shteteve të Bashkuara, duke përfshirë Kaliforninë, Misurin dhe Oregonin, si dhe vende të tjera si Kina, Zelanda e Re dhe Australia. Në evropë, aurorat zbukuruan qiellin e natës në gjermani, francë, britani e madje edhe në ukrainën në luftë. Ajo që nisi të premten, ishte stuhia e madhe gjeomagnetike që NOAA e kishte paralajmëruar që nga viti 2005. Stuhia diellore më intensive në histori, e regjistruar në 1859, nxiti aurorat në Amerikën Qendrore. Kjo stuhi paraqet rrezik për linjat e transmetimit të tensionit të lartë të rrjeteve të energjisë, jo për linjat elektrike në shtëpitë e njerëzve. Satelitët gjithashtu mund të preken, gjë që nga ana tjetër mund të cënojë shërbimet e navigimit dhe komunikimit në Tokë. Një stuhi ekstreme gjeomagnetike në vitin 2003, për shembull, ndërpreu energjinë në Suedi dhe dëmtoi transformatorët e energjisë në Afrikën e Jugut. Edhe pasi stuhia ka mbaruar, sinjalet mes satelitëve GPS dhe marrësve tokësorë mund të kenë probleme. Por ka kaq shumë satelitë navigimi sa që çdo ndërprerje nuk duhet të zgjasë shumë. E gjithë kjo është pjesë e aktivitetit diellor që rritet ndërsa dielli i afrohet kulmit të ciklit të tij 11-vjeçar. NASA tha se stuhia nuk përbënte kërcënim serioz për shtatë astronautët në bordin e Stacionit Ndërkombëtar të Hapësirës. Shqetësimi më i madh është rritja e niveleve të rrezatimit dhe ekuipazhi mund të lëvizë në një pjesë më të mbrojtur të stacionit nëse është e nevojshme.