Skuadrat e shpëtimit po përpiqen të ndihmojnë më shumë se 1 mijë automjete që janë bllokuar në një autostradë prej dy ditësh pasi një stuhi e madhe bore goditi japoninë. Autoritetet kanë shpërndarë ushqime, karburant dhe batanije për shoferët e bllokuar në autostradën që lidh kryeqytetin Tokjo me Niigatën, në veri. Bora që nisi të mërkurën në mbrëmje ka shkaktuar shumë bllokime trafiku gjatë rrugës. Ajo po ashtu ka bërë që më shumë se 10 mijë shtëpi të mbeten pa energji elektrike. Zyrtarët thanë se po përdorin makineri të rënda por edhe punë fizike për të cliruar automjetet e bllokuara në borë, një e nga një. Një tjetër bllokim i ngjashëm është regjistruar edhe në një tjetër autostradë por në këtë rast të bllokuara kanë mbetur 300 automjete. Sipas meteorologëve, reshjet e borës që janë më intensivet e kësaj vale të ftohti, pritet të vazhdojnë edhe gjatë fundjavës. Kryeministri japonez ka mbledhur shtabin e emergjencave dhe i ka bërë apel publikut të tregojë kujdes. Stuhia e borës vjen ndërsa japonia po përballet me valën e tretë të koronavirusit, që ka shtuar pa masë presionin mbi spitalet e vendit.