Ministri i Ekonomisë Kulturës dhe Inovacionit Blendi Gonxhja përmes një postimi në rrjetet sociale njoftoi se janë shpallur 22 bashki fituese për Projektin e Investimeve të Strehimit Social. Sipas tij ka një vlerë financimi prej 490 milionë lekësh nga buxheti i shtetit. Këto projekte synojnë që të adresojnë nevojat për përmirësimin e kushteve të banimit për 847 familje në nevojë në të gjithë vendin. Por cilat janë familjet përfituese nga ky projekt? 11 për qind e tyre janë familje me ndihmë ekonomike, 21,6 për qind të moshuar por pa përkrahje, 13.2 për qind persona me aftësi të kufizuar dhe pjesa tjetër familje me një prind, me gra kryefamiljare, emigrantë të rikthyer dhe viktima të trafikimit. Ndërsa shpërndarja e fondeve do të bëhet sipas planit ku, 57 milionë lekë janë për adaptimin e objektit dhe kthimin në banesë sociale për strehimin e 35 familjeve në kushte të vështira ekonomike, në Bashkinë Mat. Më tej, 335 milionë lekë për programin e “Përmirësimit të kushteve të banimit” për 547 familje në 19 bashki. Gjithashtu, 98 milionë lekë për përmirësimin e infrastrukturës në zonat informale për 265 familje, që i përkasin kategorive të strehimit social.