Dezertorët rusë, të cilët rrezikojnë ndëshkime të rënda, mund të aplikojnë për mbrojtje ndërkombëtare në Gjermani, tha ministrja e Brendshme e vendit Nancy Faeser. Kurse kundërshtarët e regjimit rus që janë në "rrezik të madh” mund të aplikojnë për azil politik, tha ajo. Faaser tha edhe se Zyra e Migracionit në Gjermani është vënë në dijeni për këtë dhe ka aktualizuar rregulloren përkatëse. Por vendimi për azil politik është një vendim individual, në kuadër të të cilit bëhet edhe një kontroll i sigurisë. Ministri gjerman i Drejtësisë Marco Buschmann, tha po ashtu se të gjithë ata që urrejnë atë cka po bën Putin, dhe duan demokracinë, janë të mirëpritur në gjermani. Reagimi pasoi vendimin e Putinit për mobilizim të pjesshëm, cka do të thotë rekrutim të 300 mijë rezervistëve. Pas këtij vendimi, shumë të rinj janë përpjekur të largohen nga rusia me biletat e avionëve që u shitën me shpejtësinë e dritës e madje edhe me cmime të ekzagjeruara. Edhe një zëdhënëse e Komisionit të BE-së tha enjten në Bruksel se ata që duan të largohen nga lufta, kanë të drejtë të kërkojnë azil në vendet e BE-së. Por parimisht duhen marrë parasysh edhe aspektet e sigurisë. Por jo të gjitha vendet janë të gatshme t'u japin strehim shtetasve rusë. Çekia për shembull, është kundër: Qeveria në Pragë nuk u jep mbrojtje ndërkombëtare rusëve që detyrohen të largohen nga vendimet e Putinit, tha ministri i Jashtëm i Çekisë, Jan Lipavsky. "Vetëm mosplotësimi i detyrimeve ndaj vendit nuk përbën kusht për të kërkuar vizë humanitare," argumentoi ai. As vendet baltike, Estonia, Letonia dhe Lituania nuk janë të gatshëm të presin dezertorët rusë.