Ish-ministri i Shëndetësisë, Ilir Beqaj ka kërkuar pushimin e akuzave të ngritura ndaj tij në kuadër të dosjes së “Sterilizimit”. Beqaj ka vijuar paraqitjen e kërkesave paraprake, duke kërkuar pavlefshmëri të të gjitha provave digjitale, maile dhe komunikime. Kërkesa u bë me pretendimin se laboratori i SPAK për verifikimin e origjinalitetit të provave digjitale nuk ka akreditim. “Tre herë avokati im ka pyetur a është laboratori i akredituar. BKH thotë, kjo i takon SPAK. SPAK nuk ka kthyer përgjigje. Në ekspertimet që përdor SPAK, përdoren disa softëare që nuk vlejnë më. Provat digjitale të përjashtohen. Kërkoj të përjashtohet si provë “aneksi 5”, pasi është një letër pa firmë, pa vulë. As dokument nuk mund të quhet, jo më provë”, tha Beqaj. “Unë si ministër, as pranoj faturë, as firmos pagesë. Ligji nuk saktëson se cila është sjellja e gabuar. Kërkoj pushimin e çështjes penale. Unë nuk kam vjedhur. As Ilir Rrapaj nuk ka vjedhur”, tha ai. Beqaj tha se mund të pranojë gjithçka, por vetëm akuzën e fryrjes së kostove të koncesionit nuk mund të marrë përsipër. Sipas ish ministrit, SPAK nuk ka verifikuar kostot e sterilizimit përmes veprimeve hetimore në QSUT, por thjesht i ka përllogaritur ato.