Frank-Walter Steinmeier u nis të martën në Varshavë por në publik nuk u tha se ishte planifikuar edhe një udhëtim tjetër, në fshehtësi të plotë. Presidenti polak, Duda po përpiqej prej ditësh për një udhëtim të përbashkët në nivel të lartë: pesë presidentë europianë, së bashku tek presidenti ukrainas, Volodymyr Zelensky. Por gjërat u zhvilluan ndryshe. Kur Steinmeier në konferencën e shtypit me presidentin polak, Duda në mënyrë të papritur po i bënte bisht përgjigjeve të pyetjeve, u bë e qartë, se diçka nuk shkonte. Pak më vonë doli lajmi në mediat gjermane: "Zelensky i ndalon udhëtimin në Ukrainë presidentit Steinmeier!" Pak më vonë presidenti gjerman doli para kamerave. Kolegu dhe miku i tij, presidenti polak, Andrzej Duda kishte pasur idenë, që ata së bashku me presidentët e vendeve balltike të ndërmerrnin një udhëtim në Kiev, për të "dërguar atje një sinjal të fortë solidariteti me Ukrainën", tha Steinmeier në një deklaratë të shkurtër. "Isha i gatshëm për këtë, por me sa duket, dhe më duhet ta regjistroj këtë, se kjo nuk ishte e dëshiruar në Kiev." E paraqitur me gjuhë të qartë, por dukej, se presidenti ishte i prekur. Nuk pati shpjegim për arsyet e refuzimit, ka vetëm shumë spekulime.