Një numër I madh agjentësh rusë janë dëbuar nga Gjermania së fundmi ndërsa kanë bërë përpjekje të mëdha për akte sabotimi nën udhëheqjen e Moskës. “Autoritetet gjermane po bëjnë gjithçka që munden për të luftuar spiunazhin rus, sabotimin dhe sulmet kibernetike", tha zëdhënësja e Ministrisë së Brendshme, Sonja Kock, gjatë një konference për media ndërsa sqaroi se shërbimet ruse të inteligjencës që veprojnë në Gjermani janë "dobësuar së fundi nga dëbimi i shumë agjentëve". Kock, nuk dha një numër të saktë apo se kur saktësisht kanë ndodhur këto dëbime. Deklaratat e saj erdhën pasi mediat gjermane raportuan se besohet që shërbimet ruse të inteligjencës kanë punësuar operativë të nivelit të ulët, lidhur me një komplot për të vendosur pajisje shpërthyese në avionë transportues të DHL-së. Sipas mediave gjermane, këta agjentë nuk kishin asnjë pozitë brenda shërbimeve të sigurisë dhe zakonisht rekrutoheshin përmes aplikacioneve të mesazheve për të kryer operacione në këmbim të parave. Kock deklaroi të mërkurën se "rreziku i sabotimeve... është rritur ndjeshëm në Gjermani që nga fillimi i luftës së Rusisë kundër Ukrainës".