Duken si fqinjë të mirë. Disa kanë familje me fëmijë dhe bëjnë një jetë të qetë. Të tjerët janë studentë, që ndjekin universitete në vende të ndryshme, punojnë si shkencëtarë. Në Rusi, ata konsiderohen elita mes spiunëve. Vladimir Putin i quan "Ëunderkinder" - "fëmijë mrekulli". Të gjithë këta, janë agjentë të inteligjencës ruse, të cilët jetojnë nën një identitet të rremë: shpesh për vite dhe nganjëherë dekada në vendin ku janë me mision. Ata nuk kanë mbrojtje diplomatike dhe përballen me burgime të gjata nëse zbulohen. Shërbimet gjermane të sigurisë besojnë se Rusia do t'i përdorë gjithnjë e më shumë këta spiunë në të ardhmen, dhe se spiunë të tillë janë tashmë aktivë në Gjermani. Që nga fillimi i pushtimit rus të Ukrainës në shkurt 2022, disa spiunë rusë janë zbuluar në Holandë, Greqi, Norvegji dhe Slloveni. Zyra për Mbrojtjen e Rendit Kushtetues në Gjermani, thotë se Rusia kryen aktivitete të gjera spiunazhi në Evropën Perëndimore. Prej disa javësh, shërbimet e inteligjencës evropiane kanë paralajmëruar gjithnjë e më shumë për sabotazhe dhe zjarre, të cilat mund të shkaktohen nga spiunët rusë. Tashmë ka pasur disa arrestime në Poloni dhe gjermani. Programi i spiunazhit u krijua menjëherë pas themelimit të Bashkimit Sovjetik në 1922. Më pas KGB-ja dërgoi spiunë me biografi të rreme në të gjithë botën. Pas përfundimit të Luftës së Ftohtë, ky spiunazh u vazhdua nga shërbimi i ri i inteligjencës së jashtme ruse SVR. Përveç kësaj, shërbimi rus i inteligjencës ushtarake GRU ka përdorur përsëri "ilegalë" për disa vite. Sipas informacioneve, Rusia ende përdor një mjet klasik për spiunët, që operojnë ilegalisht, i cili duket si një relikt nga Lufta e Ftohtë: komunikimin me radio valë të shkurtra. Këto mesazhe, në parim, mund të dëgjohen nga kushdo, gjë që e bën të vështirë identifikimin e marrësve të vërtetë. Mesazhet janë të koduara dhe mund të lexohen vetëm me kodin e duhur të deshifrimit.