Në landin e Nord Rin Vestfalisë, në Gjermani, ka nisur gjyqi kundër një oficeri rezervë të ushtrisë gjermane. Ai dyshohet se i ka dhënë informacione sekrete rusëve prej vitesh. 65-vjeçari duhet të përgjigjet para Gjykatës së Lartë Rajonale të Dyseldorfit ku akuzohet për spiunazh. Sipas prokurorit federal, oficeri rezervist i ka dhënë shërbimit sekret rus GRU informacione mbi rezervistët gjermanë dhe bashkëpunimin civilo-ushtarak në situata krize midis 2014 dhe 2020. Bëhet fjalë edhe për pasojat e sanksioneve të vendosura ndaj Rusisë në vitin 2014 si dhe gazsjellësin Nord Stream 2 në Detin Baltik. Përveç kësaj, i akuzuari thuhet se u ka dhënë rusëve detajet e kontakteve private të anëtarëve të lartë të Bundesverit dhe përfaqësuesve të biznesit. Politika e sigurisë dhe e mbrojtjes së SHBA-së dhe aleatëve të saj perëndimorë është një çështje tjetër që përmendet. Sipas aktakuzës, dokumentet dhe informacionet kanë ardhur pjesërisht nga burime publike, por edhe nga burime jopublike. Nënkoloneli nën akuzë në një masë të madhe ka pranuar se ka dhënë informacione, tha një zëdhënëse e gjykatës. Zyra e prokurorit federal dyshon si motiv simpatinë për Rusinë. Në hetimet e deritanishme nuk ka të dhëna për pagesa me para të shërbimeve. Por i akuzuari kishte shpresuar për avantazhe të tilla si ftesa për konferencat e sigurisë në Rusi dhe ftesa të tilla ai ka pasur.