Deputetja socialiste dhe ish ministrja e Jashtme Elisa Spiropali u ka kthyer përgjigje kritikave publike të Edi Ramës për qëndrimin e saj në mbështetje të protestës së qytetarëve. Përmes një postimi në rrjetet sociale Spiropali shkruan se Shqipëria do ta ketë marrëveshjen e re dhe për të arritur këtë duhen ndryshime në Partinë Socialiste. ‘Po, do ta kemi Marrëveshjen e Re për Shqipërinë. Shqipërinë që duam të ndërtojmë, duhet ta bëjmë, dhe do ta bëjmë, më të hapur, më të drejtë, më meritokratike, më europiane. Për ta arritur këtë, Partisë Socialiste i duhet të gjejë forcat, të mbledhë mendjen, të vetëpastrohet, të bëhet më dinamike, më demokratike, më kompakte, për të mbetur gjithmonë e re, gjithmonë e pastër, pa smërçe, pa ndryshqe, pa pehlivanllëqe Ta bëjmë Marrëveshjen e Re të madhe, të thellë, të vërtetë, duke pasur parasysh, se po nuk lartësuam veten, nuk mund ta përmirësojmë vendin’, shkruan ajo.