Një spektakël madhështor lulesh dhe ngjyrash ka shpërthyer në shkretëtirën Atacama të Kilit, një nga vendet më të thata në Tokë, pasi fenomeni klimatik El Niño solli reshje të dendura shiu në rajon. Nën tokën që zakonisht është e tharë, miliona fara nga rreth 200 lloje të ndryshme qëndrojnë në pritje të ujit. Reshjet e dendura të shkaktuara nga fenomeni i motit El Niño goditën së fundmi pjesën veriore të Kilit, duke bërë që kjo shumëllojshmëri e ngjyrash të lulëzojë. Tani, hapësira të gjera me lule me ngjyrë vjollcë mbulojnë shkretëtirën, ndërsa sytha të bardhë shfaqen nga toka e plasaritur. Dhjetëra turistë ndalojnë për të fotografuar peizazhin mahnitës. Reshjet sezonale prej më shumë se 180 milimetrash në disa zona "nuk ishin regjistruar kurrë më parë", tha për AFP-në Cesar Pizarro, kreu i departamentit të biodiversitetit të Atacamës. Uji i shiut depërtoi më thellë se zakonisht në rërë, duke i dhënë jetë rezervatit natyror që ndodhet rreth 800 kilometra në veri të Santiagos.