Përmbytjet vdekjeprurëse që përfshinë Valencian në fillim të këtij muaji, që shkaktuan më shumë se 220 viktima dhe qindra të tjerë të plagosur, kanë shtyrë qeverinë spanjolle në miratimin e një dekreti i cili parashikon që personat të cilët preken nga fatkeqësitë natyrore katastrofike të përfitojnë leje nga puna. Ky dekret është quajtur si një lloj ‘leje klimatike’ që do të aplikohet te cdo shtetas spanjoll në raste të njëjta apo të ngjashme. Lajmi u njoftua nga ministri i Ekonomisë, Carlos Cuerpo, i cili shpjegoi se këto pushime me pagesë do të zgjasin nga 1 deri në 4 ditë dhe do të jenë të disponueshme kur një i punësuar nuk mund të shkojë fizikisht në punë, apo ta krejë funksionin e tij nga distanca. Propozimi ishte i ngjashëm me legjislacionin e vitit 2021 në Kanada, i cili përcakton se si punëtorët mund të përfitojnë nga pushimi me pagesë pas një alarmi klimatik të lëshuar nga autoritetet kompetente, si Mbrojtja Civile. Ministrja e Punës, Yolanda Díaz, shtoi se lejet do të aktivizohen në rast të alarmeve të motit ose paralajmërimeve për fatkeqësi. Dekreti i miratuar nga qeveria parashikon edhe një ndihmë financiare prej më shumë se 2.2 miliardë euro në favor të zonave të prekura nga përmbytjet në fund të tetorit. Përvec kësaj ndihme, do të shpërndahen edhe bonuse deri në 10 mijë euro për personat që nga fatkeqësia natyrore kanë humbur makinat, motorat apo bicikletat e tyre. Pas fatkeqësisë që goditi Valencian, mijëra qytetarë protestuan në sheshe për mënyrën se si u menaxhua situata që prodhoi bilanc tragjik njerëzish të vdekur dhe të zhdukur.