Kryeministri i Spanjës, Pedro Sánchez, ka hedhur poshtë propozimin e NATO-s që shtetet anëtare të rrisin shpenzimet e tyre të mbrojtjes në 5% të PBB-së së tyre, duke thënë se ideja "jo vetëm që do të ishte e paarsyeshme, por edhe kundërproduktive". Sánchez tha se nuk po kërkonte të ndërlikonte samitin e NATO-s që do të mbahet javën e ardhshme në Hagë, por donte që të kishte një "formulë më fleksibël" që ose do ta bënte objektivin opsional ose do t'i lejonte Spanjës të përjashtohej. Propozimi, i paraqitur nga sekretari i përgjithshëm i NATO-s, Mark Rutte, në përgjigje të kërkesave të Donald Trump për një objektiv prej 5%, sugjeron që shtetet anëtare të bien dakord të rrisin shpenzimet e mbrojtjes në 3.5% të GDP-së së tyre dhe të përdorin edhe 1.5% të Produktit të brendshëm bruto për shpenzime më të gjera të sigurisë. Në një letër drejtuar Rutte-s, Sánchez vuri në pikëpyetje pasojat e mundshme të një rritjeje të tillë, duke thënë se kjo do të ishte e papranueshme për Spanjën dhe vizionin e saj për botën. "Angazhimi për një objektiv prej 5% jo vetëm që do të ishte i paarsyeshëm, por edhe kundërproduktiv, sepse do ta largonte Spanjën nga shpenzimet optimale dhe do të pengonte përpjekjet e vazhdueshme të BE-së për të forcuar ekosistemin e saj të sigurisë dhe mbrojtjes", tha ai. "Është e drejta legjitime e çdo qeverie të vendosë nëse është apo jo e gatshme të bëjë këto sakrifica. Si një aleat sovran, ne zgjedhim të mos e bëjmë." Spanja aktualisht është shumë prapa vendeve të tjera perëndimore duke i kushtuar vetëm rreth 1.3% të Produktit të brendshëm bruto të saj shpenzimeve të mbrojtjes, shumë më pak se objektivi aktual i NATO-s prej 2%. Ajo ka sugjeruar një objektiv prej 2.1%.