Qeveria spanjolle të enjten në mbrëmje shpalli gjendje të jashtëzakonshme kombëtare pasi një seri zjarresh kërcënuan komunitetet pranë Madridit dhe në provincën fqinje të Avilës, duke detyruar më shumë se 10,000 njerëz të evakuohen ndërsa zjarrfikësit luftuan për të kontrolluar flakët. Ministria e Brendshme tha se vendimi u mor për shkak të shpërthimit të njëkohshëm të disa zjarreve, kushteve të pafavorshme të motit dhe nevojës për të mobilizuar burime të gjera nga administrata të ndryshme publike, duke rritur kompleksitetin e përpjekjeve të zjarrfikësve dhe mbrojtjes civile. Spanja dhe pjesa më e madhe e Evropës Jugore përballen me sezone gjithnjë e më të rënda zjarresh në pyje që shkencëtarët i kanë lidhur me ndryshimet klimatike. Ekspertët thonë se bimësia e rritur shumë pas reshjeve jashtëzakonisht të dendura të pranverës, është tharë në vapën ekstreme të verës, duke krijuar lëndë djegëse për zjarre që përhapen me shpejtësi.