Qeveria spanjolle ka vendosur të mbyllë hapësirën e saj ajrore për avionët e përfshirë në operacionet ushtarake të SHBA-së dhe Izraelit kundër Iranit. Vendimi përfshin edhe ndalimin e përdorimit të bazave ushtarake në Rota dhe Morón, duke kufizuar çdo aktivitet që lidhet me ofensivën në rajon. Sipas mediave, masa shtrihet për të gjitha fluturimet e lidhura me operacionin, pavarësisht nëse ato nisen nga Spanja apo nga baza në vende të tjera si Mbretëria e Bashkuar dhe Franca. Ky vendim shihet si një përpjekje e Madridit për të shmangur përfshirjen direkte në konfliktin në Lindjen e Mesme dhe për të ruajtur një qëndrim neutral në një situatë të tensionuar ndërkombëtare. Autoritetet spanjolle theksojnë se masa është pjesë e një politike të kujdesshme sigurie dhe nuk synon të dëmtojë bashkëpunimin me aleatët, por vetëm të kufizojë përdorimin e hapësirës ajrore kombëtare për operacione që lidhen me luftën në Iran.