Barcelona do të rrisë taksën turistike për pasagjerët e krocerave që vizitojnë qytetin për më pak se 12 orë, tha kryebashkiaku i qytetit në një intervistë të botuar të dielën. Jaume Collboni tha se taksa aktuale turistike për pasagjerët e krocerave me ndalesë ishte 7 euro në ditë. Por ai nuk tha se sa do të rritet taksa. "Ne do të propozojmë një rritje të konsiderueshme të taksës për pasagjerët e anijeve me ndalesë," i tha ai gazetës El Pais. "Në rastin e këtyre pasagjerëve, me ndalesë më pak se 12 orë, ka përdorim intensiv të hapësirës publike pa asnjë përfitim për qytetin ndërkohë që përhapet një ndjenjë okupimi dhe ngopjeje. Ne duam të kemi turizëm që respekton destinacionin." Ai tha se turistët, jo taksapaguesit vendas, duhet të paguajnë për projekte lokale si shkollat me ajër të kondicionuar.